2025 жылы Алаш көсемі, мемлекет және қоғам қайраткері, ақын, жазушы, ағартушы Міржақып Дулатұлының дүниеге келгеніне 140 жыл толады. Осы күн қарсаңында Федоров аудандық орталық кітапханасында «Міржақып Дулатұлы – халықты оятқан ақыны» кітап көрмесі рәсімделді. Көрме 2 бөлімнен тұрады. «Ғұмырнамалық беттер» бірінші бөлімінде М. Дулатұлының қызы – Гүнар Дулатованың «Алаштың сөнбес жұлдыздары», Қ. Сақтың «Алаш мұрасы», т.б. әдебиет және мұрағаттық суреттер ұсынылған. «Оянған жүрек үні: әдеби мұра» екінші бөлімінде М.Дулатұлының туындылары, сонымен қатар Азамат, Таймінер және Мадияр бүркеншек аттарымен жазылған «Ақ жол» газетінде жарияланған мақалалардан тұрады.
